I-Arhente yoKhuseleko lwezeNtlalo yoMzantsi Afrika (SASSA) ihlabe ikhwelo kubaxhamli bezibonelelo zoNcedo lweNtlalo kwiNtlupheko (SRD)
I-Arhente yoKhuseleko lwezeNtlalo yoMzantsi Afrika (SASSA) ihlabe ikhwelo kubaxhamli bezibonelelo zoNcedo lweNtlalo kwiNtlupheko (SRD) ukuba bagqibe ngokukhawuleza uqinisekiso lwezazisi zabo ukuze kuthintelwe ukulibaziseka okanye ukuphazamiseka kwentlawulo.
Oku kuza emva kokuba i-arhente iphinde yazisa inkqubo yobhaliso lwebhayometriki enyanzelekileyo kunye nenkqubo yoqinisekiso lwezazisi eyenzelwe ukomeleza ukhuseleko, ingakumbi kwabo baxhamlayo abasebenzisa iindlela ezizezinye zokuchonga endaweni yenombolo yesazisi esinedijithi ezili-13 zaseMzantsi Afrika.
Isibonelelo se-SRD saphehlelelwa okokuqala ngurhulumente ngo-2020 njengenyathelo likaxakeka ukuphelisa ubunzima bezemali obubangelwa ngubhubhani we-COVID-19.
Kwingxelo ekhutshwe noonondaba kwiveki ephelileyo, isithethi sakwaSASSA eMpumalanga uSenzeni Ngubeni uthe bonke abaxhamli kufuneka baqhube inkqubo yokuqinisekisa ukunqanda ukulibaziseka ekufumaneni kwabo isibonelelo.
“Ayikho indlela enqumlayo, bonke abaxhamli ekufanele baqhube le nkqubo kufuneka benjenjalo ukunqanda ukulibaziseka kunye nokudana kokungasifumani isibonelelo,” utshilo uNgubeni.
UNgubeni uchaze ukuba abaxhamli abafumana umyalezo wesimo “sokuqinisekiswa kwesazisi” bangakwenza oko ngenxa yezenzo zobuqhophololo ezikrokrelekayo okanye ukungangqinelani kweenkcukacha zabo, kwaye wabacela ukuba baqinisekise iinkcukacha zabo nokuba kukwi-ofisi yabo yengingqi yakwa-SASSA okanye ngokungena kwiwebhusayithi.